Ten einde Affies se onderrigfasiliteite vérder te verbeter, neem bouwerk aan 14 nuwe klaskamers in 2022 ‘n aanvang.
Die nuwe gebou word op die oostelike wal van die B- en C-rugbyveld opgerig en vervang die vyf tydelike klasse wat in die jare negentig noodgedwonge opgerig moes word, nadat die skool se oorskakeling na Model C ‘n ongekende groei in leerlingtal tot gevolg gehad het.
Die argitek, Engela White , ‘n Affie-ouer, het haar inspirasie hoofsaaklik geput uit elemente van die Joubert-huis waarin die Afrikaanse Hoërskool, die moederskool van die Afrikaanse Hoër Seunskool en die Afrikaanse Hoër Meisieskool, in 1920 die lig gesien het.