Koshuis

Geskiedenis

Die skool se eerste seunskoshuis, ‘n woonhuis wat in Prinsloostraat gehuur is, het sy deure in 1922 geopen. 32 seuns is hier gehuisves. Die eerste koshuis op die skoolterrein is in 1929 gebou. In 1969 is ‘n tweede koshuis, Huis Frank le Roux, ingewy. In 1993 is twee blokke aangebou om ‘n addisionele 116 seuns te akkommodeer.

Huis Pannevis

Die koshuis huisves tans 350 seuns, waarvan meer as 70 graad 8`s is. Graad 8-leerlinge word in die skool se oudste koshuis, Huis Pannevis, gehuisves, waar die koshuis-onderhoofseun en vier prefekte `n wakende oog hou.

Huis Frank le Roux

Leerlinge in ander grade, asook die koshuishoofseun, woon in Huis Frank le Roux in graadverband per gang. Elke gang het ‘n voog en prefek. Al die kosgangers maak van dieselfde eetsaal gebruik.

Huis Kruger

Hierdie aparte koshuis in Arcadia is vanaf Januarie 2016 in gebruik. Daar kan 18 senior seuns woon. Hierdie seuns pendel daagliks na die skool, eet saam met al die ander seuns in die eetsaal en skakel normaal by buitemuurse aktiwiteite in.

Studie

Die graad 8’s studeer saans onder toesig. Smiddae werk seuns in die mediasentrum, omdat hulle eers vanaf 16:00 in die koshuis toegelaat word.

Ontspanningsaal

Huis Frank le Roux beskik oor ‘n ontspanningsaal wat toegerus is met televisie en ‘n tafeltennis- en biljardtafel.

Daar is Wi-Fi beskikbaar. Die rekenaars van die mediasentrum kan deur koshuisleerlinge gebruik word.

Inskakeling

Graad 8’s deurloop ‘n oriënteringsprogram wat daarop gemik is om hulle inskakeling te vergemaklik, voordat die skool vir ander leerlinge in Januarie open.

Buitemuurse aktiwiteite

Dit word van alle kosgangers verwag om by minstens een buitemuurse skoolaktiwiteit per kwartaal in te skakel.

Die Koshuislewe

Die kragmetings tussen Koshuis en Dorp (die dagskoliere) op talle terreine van die skoollewe is hoogte- punte op die Affie-kalender. Die eerste kragmeting van die jaar is die atletiekinterhuis waartydens die koshuis die spanne van die dagskoliere die stryd aansê. Later in die jaar ding die koshuisspan en die dorpspan ook in ander aktiwiteite mee: swem, rugby, krieket, waterpolo, hokkie en gholf.

Gesamentlike sosiale geleenthede word vir die kosgangers van AHS en AHMP gereël en die seuns word toegelaat om laatmiddag by vriendinne in die meisieskoshuis te gaan oë wys.

Koshuisleerlinge word hartlik uitgenooi om by die gemeente-aktiwiteite van die Oos-kerk in te skakel.

Die koshuis sou dwarsdeur die geskiedenis ‘n beduidende rol speel om ‘n besondere etos in die skool te help skep. SJ Roos, ‘n oud-leerling uit die 1930’s, vertel hoe die koshuisseuns reeds tóé soos “vriende en broers” saamgeleef het. Tot vandag toe is dit waar – dáárvan sal enige Affie getuig.

Personeel:

Koshuishoof: (algeheel)

Koshuisvader (senior):

Koshuisvader (junior):