RAPPORTE EN OUERAANDE

U seun se rapport word Vrydag (13 Augustus) elektronies aan u gestuur. Let asseblief daarop dat die rapport slegs die afgelope mini-eksamen se punte bevat.

As gevolg van die Covid-regulasies is ons genoodsaak om vanjaar virtuele oueraande op Woensdag 18 en Donderdag 19 Augustus te hou. U moet asseblief vooraf vir die genoemde datums self ‘n afspraak tussen 17:00 en 20:00 met u seun se vakpersoneel maak. ‘n Aparte brief met die spesifieke instruksies sal gestuur word.

Ons doen ‘n dringende, dog vriendelike, beroep op alle ouers om u seun se rapport met hom te bespreek en om enige probleme met sy vakpersoneel op te neem. Die graadvoogde is ook beskikbaar om u by te staan.

BUITEMUURSE AKTIWITEITE

Volgens die nuutste Staatskoerant mag alle skoolaktiwiteite binne die voorgeskrewe protokol hervat. Toeskouers word ongelukkig steeds nie toegelaat nie. Seuns moet asseblief met hul afrigters kontak maak oor hul oefentye en wedstryde. Ons het drie interskole wintersportbepalings teen Jeppe (21 Augustus), KES (28 Augustus) en PBHS (4 September). Alhoewel al drie dae tuisbepalings is, sal sekere spanne, as gevolg van die beperking op getalle, op ons opponente se velde moet speel. Daar is heelwat ander wedstryde vir hokkie en ander sportsoorte wat tussendeur geskeduleer is.

Die vier skole wat by die interskole betrokke is, het ooreengekom dat die A- tot D-rugbyspanne by die o/14’s, o/15’s en o/16’s sal speel. By die seniors word daar beplan vir rugbyspanne 1 tot 6. In hierdie stadium is daar wedstryde vir alle hokkiespanne.

Aangeheg by hierdie skrywe is ‘n memorandum waarop die meeste openbare seunskole in Gauteng gesamentlik ooreengekom het. Dit handel hoofsaaklik oor die wyse waarop ons terugkeer na sport en lê veral klem op die feit dat daar steeds geen toeskouers mag wees nie en dat ouers vriendelik versoek word om nie langs skoolheinings saam te drom in ‘n poging om die wedstryde te kyk nie. Sover moontlik sal alle hokkie- en rugbywedstryde via stromingsdienste uitgesaai word. Vergewis uself asseblief van die inhoud en by voorbaat dankie vir u ondersteuning in dié verband.